20,5% выпускнікоў не здалі іспытаў на атэстат сталасьці

Кожны пяты выпускнік сярэдняй школы ў Польшчы ня здаў іспытаў на атэстат сталасьці – паведамляе «Gazeta Wyborcza». Вынікі экзамэнаў павінны былі быць апублікаваныя апоўначы, але некаторыя маладыя людзі скардзіліся, што ўдалося ім увайсьці на сайт экзамэнацыйных камісій толькі а 5 раніцы.

79,5% здаючых атрымала пазытыўны вынік. 15 адсоткаў праваліла толькі адзін іспыт, і зможа пісаць паўторна экзамэн у жніўні. Іншыя змогуць здаваць толькі праз год, паколькі яны праваліліся на больш, чым адным прадмеце. Часьцей за ўсё выпускнікам не ўдавалася здаць матэматыку. Катастрофы, як у мінулым годзе, не было, – адзначае настаўнік матэматыкі Дарыюш Кульма. Хаця, на ягоную думку, іспыты былі адносна простыя, і таму больш вучняў павінна было іх здаць.

Сёлетнія выпускнікі ўпершыню ў гісторыі атрымалі права рабіць здымкі прац, якія можна прагледзець пасьля праверкі. Калі яны вырашаць, што вынік выклікае іх сумневы, то могуць зрабіць фатаграфію працы, каб кансультавацца з настаўнікам і ўнесьці заяву аб паўторнай праверцы. Дзякуючы здымкам працэдура будзе больш простай.

Gazeta Wyborcza/нг