П. Усаў: Лукашэнку не падабалася папулярнасьць Шуневіча

Дзейнасьць Ігара Шуневіча выклікала шмат пытаньняў і крытыкі найперш з боку грамадзкай супольнасьці. Гэта жорсткія затрыманьні апазыцыйных актывістаў, разгон акцый у 2017 годзе, факт, што Шуневіч любіў апранацца ў форму НКУС. Апошняя справа зьвязаная з масавым затрыманьнем цыганоў пасьля забойства працаўніка ДАІ.

Усё ж на думку Паўла Ўсава, ня гэта было галоўнай прычынай адкліканьня Шуневіча.

П. Усаў: Хоць Шуневіч сам падпісаў дакумэнт аб адстаўцы, то відавочна, што гэта было адкліканьне. Яно зьвязана з тым, што Шуневіч фактычна стаў другой асобай у медыяпрасторы Беларусі. А гэта стварала канкурэнцыю для вобліку Лукашэнкі, бо ў Беларусі можа быць толькі адна моцная і публічная асоба – гэта фігура Лукашэнкі.

Другі момант зьвязаны з дзейнасьцю расейскіх спэцслужбаў, дыпляматыі, перш за ўсё амбасадара Бабіча, які намагаўся выходзіць на ключавых асоб у Беларусі, сілавікоў. Даўно гучыць інфармацыя аб тым, што Масква шукае асоб, на якія яна магла б разьлічваць у выніку якіх-небудзь унутраных канфліктаў у Беларусі. Шуневіч падыходзіў пад гэты палітычны вобраз.

Акрамя таго, ён быў вельмі папулярным. У Акадэміі МУС нават павесілі яго партрэт. А гэта ўжо выклік асабіста Лукашэнку, чаго ён сьцярпець ня мог. На маю думку, Шуневіч мог быць выкарыстаны ў гульнях і інтрыгах з боку Расеі супраць Лукашэнцы. Адкліканьне Шуневіча менавіта ў гэты момант выклікана страхам, што ўнутры можа назраваць нейкі канфлікт, а Шуневіч для гэтага меў усе рэсурсы.

Поўная размова ў далучаным гукавым файле.

ав