Замежнае тэлебачаньне выбачаецца за непраўдзівыя зьвесткі пра польскае шэсьце

Харвацкае грамадзкае тэлебачаньне HTV папрасіла прабачэньня за хлусьлівую інфармацыю на тэму нядзельнага шэсьця «Для цябе, Польшча», якое было апісана як «сход нацыяналістаў і крайне правых сілаў» – піша "Niezalezna.pl". Тэкст з прабачэньнем прачытаў вядучы галоўнага выданьня навін. Маўляў, памылка ў перадачы інфармацыі здарылася ў выніку выкарыстаньня неправераных крыніц.

HTV паказала ў нядзельным выданьні навін сюжэт, у якім было паказана шэсьце «Для цябе, Польшча» і фрагмэнты прамовы прэзыдэнта Анджэя Дуды. Пад матэрыялам быў надпіс, што гаворка ідзе пра сход крайне правых сілаў, якія патрабуюць этнічна чыстай Польшчы. На гэтыя словы адрэагаваў амбасадар Польшчы ў Харватыі Анджэй Ясенёўскі, які зьвярнуўся ў тэлестанцыю з патрабаваньнем папрасіць прабачэньня за хлусьлівыя зьвесткі. І назваў сюжэт «маніпуляцыяй, якую немагчыма ўспрымаць спакойна».

«У дзяржаўным шэсьці прымалі ўдзел прэзыдэнт, прэм’ер-міністар, прадстаўнікі ўраду і войска. Вы ані словам не згадалі, што шэсьце ладзілі польскія ўлады» – напісаў дыплямат. І дадаў: «У шэсьці ўдзельнічала прыкладна 250 тыс. чалавек з усяе Польшчы, а сярод іх – сем’і з дзецьмі, вэтэраны і цывільныя ўдзельнікі барацьбы за вызваленьне краіны з-пад нямецкай акупацыі, якія ў часы Другой сусьветнай вайны змагаліся з фашызмам. Я быў бы ўдзячны, калі б вы прадставілі карэкціроўку гэтай інфармацыі».

Рэакцыя польскага амбасадара была заўважана большасьцю сродкаў масавай інфармацыі Харватыі.

Niezalezna.pl/нг