Паблізу беларускага мястэчка Нарач польскі дыплямат разам зь беларускімі калегамі знайшлі месца, дзе стаяў дом, у якім нарадзілася першая лэдзі Польшчы, сьвятой памяці Марыя Качыньска. Сёньня спаўняецца 75-я гадавіна з дня нараджэньня жонкі прэзыдэнта Польшчы Леха Качыньскага.
Марыя Качыньска нарадзілася ў вёсцы Махава. Месца, дзе стаяў дом, знайшоў дырэктар Польскага інстытуту ў Менску Матэвуш Адамскі.
У гэтым пытаньні дапамог беларускі журналіст, які працуе зараз у Польшчы для газэты "Rzeczpospolita", Руслан Шошын. Ён сам паходзіць зь Мядзеля. І ён падказаў, што на месцы ёсьць людзі, якія могуць дапамагчы знайсьці дом лесьніка Мацкевіча. "Дзякуючы Руслану Шошыну я зьвязаўся зь мясцовымі краязнаўцамі і ў выніку некалькіх паездак мы знайшлі гэтае месца ў лесе", - распавёў Польскаму радыё Матэвуш Адамскі.
Застаўся толькі падмурак
"Дому няма. Мы шукалі дому лесьніка, пабудаванага да Другой сусьветнай вайны непадалёк ад дарогі Кабыльнік-Мядзель. Зараз там стаіць вэтлячэбніца. У пэўным радыюсе ад гэтага месца мы змаглі знайсьці рэшткі таго, што засталося з дому Мацкевічаў – склеп, падмурак і часткова сходы ў галоўны ўваход да дому й бакавыя."
Усталяваць памятны знак не плянуюць
"Гэтае месца зараз даволі дзікае, сярод лесу, таму я ня бачу такой магчымасьці, каб усталёўваць нейкі памятны знак ці шыльду. Мы ўпэўненыя, што лепш усталяваць памятную шыльду ў касьцёле ў Кабыльніку, сёньня гэта Нарач, дзе была ахрышчаная Марыя Мацкевіч–Качыньска. Гэта годнае месца, каб увекавечыць памяць жонкі прэзыдэнта Леха Качыньскага".
Вызначыць, дзе знаходзіўся дом лесьніка Мацкевіча ў Махаве, дапамагаў прадпрымальнік Зьміцер Вінаградаў, польскія картографы й ксёндз з польскага Сопату.
Поўнае інтэрвію - у далучаным гукавым файле
падрыхтавала Яланта Сьмялоўская
фота прадастаўленыя Матэвушам Адамскім
Лес, у якім стаяў дом бацькоў Марыі Качыньскай