Нобэлеўскі ляўрэат Боб Дылан знайшоўся

Боб Дылан нарэшце адгукнуўся, паведамляе Newsweek Polskа. Вядомы амэрыканскі аўтар-выканаўца песень і паэт стаў ляўрэатам сёлетняй Нобэлеўскай прэміі па літаратуры «за стварэньне новай паэтычнай выразнасьці ў рамках амэрыканскай песеннай традыцыі».

Пасьля абвяшчэньня артыст некуды прапаў і ўвогуле не рэагаваў на тое, што стаў нобэлеўскім ляўрэатам. Гэта стала прычынай шматлікіх домыслаў і спэкуляцый, а прадстаўнікі Швэдзкай акадэміі нэрвозна камэнтавалі зьнікненьне Дылана. І вось, артыст знайшоўся. Пасьля двух тыдняў маўчаньня Боб Дылан скантактаваўся з акадэміяй і паведаміў, што прэмію прыме. Ён таксама сказаў, што пастараецца быць на цырымоніі ўручэньня ў Стакгольме 10 сьнежня, хоць стопрацэнтнай гарантыі не дае.

А сваё маўчаньне ён абгрунтоўваў тым, што... ня мог паверыць у тое, што стаў нобэлеўскім ляўрэатам.

Боб Дылан, дарэчы, вядомы тым, што стараецца ахоўваць сваё прыватнае жыцьцё. Ён стаў другім амэрыканцам цягам працяглага часу, які атрымаў Нобэлеўскую прэмію ў галіне літаратуры. Апошняй ляўрэаткай з ЗША зьяўляецца пісьменьніца Тоні Морысан, якая атрымала прэмію ў 1993 годзе. Боб Дылан – першы музыкант, ляўрэат літаратурнага Нобэля, паведамляе Newsweek Polskа.

вс