Польшча-Манголія-Паўднёвая Карэя

Прэзыдэнта суправаджае віцэ-прэм’ер і міністар эканомікі Януш Пехаціньскі ды больш за 40 польскіх бізнэсоўцаў.

Ва Ўлан-Батары адбыўся эканамічны форум і двухбаковыя перамовы. Міністар Пехаціньскі падпісаў „Дэклярацыю аб супрацоўніцтве ў галіне горназдабываючай тэхнікі й прамысловасьці”. З мангольскага боку подпіс паставіў міністар горназдабываючай прамысловасьці.

Паводле статыстычных дадзеных, да паловы гэтага году польскі экспарт у Манголію ў некалькі разоў перавышае імпарт з гэтай краіны. У 2013 годзе Польшча прадала тавары вартасьцю прыблізна 24 мільёны эўра. Імпарт з Манголіі складае ледзь 36 тысяч эўра.

На канец 2012 году ў Манголіі дзейнічала 28 фірмаў з удзелам польскага капіталу. Яны працуюць у галіне горнай прамысловасьці, інфраструктуры й будаўніцтва, фармацэўтыкі й прадуктаў харчаваньня.

Польшча разьлічвае на больш шырокі доступ да багатых мангольскіх мінэральных рэсурсаў.

У сваю чаргу гандлёвы балянс паміж Польшчай і Паўднёвай Карэяй атрымліваецца на карысьць Сэула. Дэфіцыт гандлёвага абарачэньня зьвязаны зь імпартам тавараў, які ажыцьцяўляюць карэйскія інвэстары, што вядуць вытворчасьць на тэрыторыі Польшчы, а ў далейшым прадаюць тавары на эўрапейскіх рынках. Вартасьць паўднёвакарэйскіх інвэстыцый у Польшчы складае 1 мільярд 700 мільёнаў даляраў.

Браніслаў Камароўскі падчас візыту ў Паўднёвую Карэю заахвочваў да двухбаковага супрацоўніцтва ў наступных галінах: бытавой тэхнікі, авіяцыі, вытворчасьці яхтаў, аднаўляльнай энэргіі й „зялёных” тэхналёгій, а таксама да супольных навуковых дасьледаваньняў у інфарматыцы, хімічным, касмэтычным і фармацэўтычным сэктарах.

яс