Колер упакоўкі пакажа сілу ўзьдзеяньня мэдыкамэнтаў

Малазначныя лякарствы будуць упакаваныя ў белы колер, для хранічных захворваньняў – блакітны, а небясьпечныя для здароўя – у чырвоны. Мінздароўя Польшчы плянуе такім чынам абараняць пацыентаў ад памылак.

Пасьля трагічнай сытуацыі, калі аднамесячнае дзіця замест кропель у нос атрымала лек на глаўкому, адрэагавалі аптэкары. Амаль адна тысяча чалавек падпісалі пэтыцыю ў Міністэрства аховы здароўя з заклікам увесьці правілы, якія дапамогуць адрозьніваць лек ужо з першага позірку. Міністар здароўя Канстанты Радзівіл прыхільна ставіцца да гэтай прапановы.

"Ёсьць вытворцы мэдыкамэнтаў, якія дзесяткі сваіх лекаў на зусім розныя хваробы, прадаюць амаль у аднолькавых упакоўках", – зазначае старшыня Галоўнай рады аптэкараў Марэк Томкув.

Прадстаўнікі фармацэўтычных фірмаў неафіцыйна кажуць, што прапанова ім не падабаецца. Аднародная ўпакоўка ў сьвядомасьці пацыента ідэнтыфікуе фірму. Да таго ж, кліенты аптэк больш ахвотна купляюць лекі ў бела-блакітных упакоўках. З маркетынгавага пункту гледжаньня чырвоная ўпакоўка была б трагічнай, таксама чорная. Першая асацыяцыя, якую выклікаюць дадзеныя колеры – гэта сьмерць, – адзначае адзін з прадстаўнікоў фармацэўтычных канцэрнаў. Вытворцы лекаў выступілі з прапановай, каб замест у абавязковым рэжыме мяняць колер упакоўкі, зьмяшчаць на ёй лягічныя сымбалі – акуляры, сэрца і г.д.

Статыстыкі паказваюць, што ажно 13% пацыентаў у Польшчы трапілі ў шпіталь па прычыне неадпаведнага прымяненьня лекаў.

Dziennik. Gazeta Prawna/яс