Польскія касмэтычныя фірмы прарываюцца на Блізкі Ўсход

Польскія касмэтычныя фірмы прарываюцца на Блізкі Ўсход, паведамляе эканамічная газэта Puls Biznesu. Усё больш польскіх кампаніяй, якія выпускаюць касмэтыку, імкнуцца заняць блізкаўсходнія рынкі. Прывабнай краінай зьяўляецца Іран з рынкам у 40 млн маладых іранцаў.

Нядаўна на іранскі рынак увайшла фірма Basel Olten Pharm – кампанія, якая менш вядомая ў Польшчы, чым за мяжой. Акрамя Блізкага Ўсходу, фірма інтэнсіўна пастаўляе сваю прадукцыю ў Расею. «У Іране пражывае каля 80 млн чалавек, больш за палову насельніцтва – гэта людзі ва ўзросьце да 35-і гадоў. Гэта вялікі й пэрспэктыўны рынак», – кажа старшыня праўленьня кампаніі Міраслаў Брык. Нядаўна пра пачатак паставак у Іран заявіла адна з буйнейшых польскіх касмэтычных кампаній Dr Irena Eris.

Польская касмэтычная галіна пастаўляе сваю прадукцыю ў больш чым 160 краінаў сьвету, у тым ліку ў такія далёкія куткі плянэты, як Мэксыка, Інданэзія й Аўстралія. Галоўнымі пакупнікамі польскай касмэтыкі зьяўляюцца аднак Расея й рынкі Эўразьвязу – Нямеччына й Вялікабрытанія.

У мінулым годзе ў краіны ЭЗ Польшча паставіла касмэтыкі на 4,74 млрд злотых (1,1 млрд эўра), паведамляе Puls Biznesu.

вс