Сярод замежнікаў у Польшчы найбольш кватэр купляюць украінцы

Гэта на палову больш, чым немцы – гэтак вынікае з аналізаў Міністэрства ўнутраных справаў і адміністрацыі.

Запатрабаванасьць на ўласнае жыльлё ў Польшчы сярод украінцаў стала расьці з 2014 году. Самы высокі рост куплі назіраўся ў мінулым годзе.

Акрамя кватэр, украінцы купляюць таксама зямельныя ўчасткі. Летась адпаведныя органы выдалі ўкраінцам 109 дазволаў. Гэта 47% усіх дазволаў на куплю зямлі ў Польшчы іншаземцамі.

Паводле агенцтва Home Broker, у 2016 годзе ў Польшчы кватэры й дамы купілі прыватныя асобы й фірмы са 106 краін, у тым ліку з такіх экзатычных, як Тэркс і Кэйкас або Сьера-Леонэ.

Найбольшае зацікаўленьне выклікала Варшава, дзе іншаземцам прададзена 1250 кватэр.

Паводле законаў, для набыцьця нерухомасьці ў Польшчы ад іншаземцаў патрабуецца дазвол Міністэрства ўнутраных справаў, але гэты прынцып не адносіцца да кватэр і камэрцыйнай плошчы. Міністэрства толькі зьбірае дадзеныя. Дазвол патрабуецца ў выпадку набыцьця нерухомасьці ў памежнай зоне грамадзянамі краін не з ЭЗ.

За 2016 год МУС выдала 96 такіх дазволаў – найбольш украінцам і беларусам.

яс