-Расейцы занепакоены лёсам братэрскага народу й таму прапануюць
дапамогу. Ваенныя арганізацыі атрымліваюць тысячы заяваў ад
добраахвотнікаў, якія прагнуць паехаць зь мірнай місіяй ў Новарасею,
паведаміў партал «Расейская вясна», вядомы антыўкраінскімі тэкстамі.
„Добраахвотнікі” павінны абараняць расейскамоўных землякоў на
Ўкраіне ад бандэраўцаў і Ўкраінскай нацыянальнай гвардыі. У шэрагі
атрадаў уступіла больш за тысячу былых супрацоўнікаў спэцназу,
ваеннай разьведкі й спэцыяльных антытэрарыстычных адзінак, якія ў
мінулым ваявалі ў Афганістане, Чачні й Грузіі.
Кіеў лічыць, што атрады „добраахвотнікаў” зьяўляюцца прыкрыцьцём
для ўвядзеньня на паўднёвы ўсход Украіны чарговых супрацоўнікаў
расейскіх спэцслужбаў. – Расея ня можа афіцыйна ўводзіць сваю
армію на Ўкраіну, але адправіць некалькі тысяч салдат ў формах без
апазнавальных знакаў – гэта можа зрабіць, - кажа ў размове з „RZ”
украінскі ваенны экспэрт Аляксей Арэстовыч.
Далучаны да Расеі Крым таксама накіраваў некалькі соцен чалавек
для падмацаваньня сэпаратыстаў у Славянску. Ёсьць таксама
добраахвотнікі з Паўднёвай Асэтыі, якія ў 2008 годзе змагаліся на баку
Расеі супраць Грузіі.
Чуткі пра мабілізацыю добраахвотнікаў даходзяць нават з Ізраіля.
Чальцы батальёну «Алія» гатовыя ўдзельнічаць у канфлікце на
баку сэпаратыстаў. Гэтая арганізацыя хаўрусуе вэтэранаў вайны ў
Афганістане, якія эмігравалі з Савецкага Саюзу ў Ізраіль.
Сваіх добраахвотнікаў ва Ўкраіну адпраўляе таксама Прыднястроўе,
дзе з савецкага часу стаіць расейская армія.
яс/Rzeczpospolita