Віленскія ўлады пачалі частаваць пажылых кавай і гарбатай

Акцыя носіць назву «Убачымся за кубачкам кавы», і прызначаная заахвочваць сталых людзей сустракацца ды праводзіць час разам у цэнтры горада.

Акцыя ладзіцца ў Вільні ў васемнаццаты раз.

Кожную нядзелю да 6 студзеня ўключна Віленскія ўлады запрашаюць пажылых людзей сустрэцца за бясплатным кубачку кавы ці гарбаты. Мэр Вільні Рэмігіус Шымашус адзначыў, адкрываючы акцыю ў гэтым годзе, што гэта нагода, каб мець зносіны зь іншымі людзьмі. «Кава зьяўляецца сымбалем чалавечых кантактаў, сустрэч, знаёмства з горадам і адкрыцьця для сябе новых месцаў», – дадаў мэр.

Сёлета ўдзел у акцыі ўзялі 85 кавярняў, рэстаранаў, пякарань, і таксама гатэлі. Некаторыя ўстановы прапануюць бясплатную філіжанку кавы ці гарбаты таксама ў суботу. Для ўдзелу ў акцыі трэба толькі паказаць пасьведчаньне пэнсіянэра.

ПР/юл