Украіна выслала беларускага дыплямата

Міністэрства замежных спраў Украіны ў адказ на абвяшчэньне Менскам украінскага дыплямата Ігара Скварцова пэрсонай нон-грата ў Беларусі выслала з Украіны супрацоўніка пасольства Беларусі ў Кіеве.

Пра гэта агенцтву УНІАН паведаміла прэс-сакратар МЗС Мар'яна Беца.

«У сувязі з інфармацыяй беларускага боку пра абвяшчэньне пэрсонай нон-грата супрацоўніка пасольства Ўкраіны ў Беларусі хацелі б адзначыць, што ўкраінскі бок на аснове прынцыпу ўзаемнасьці таксама выслаў беларускага дыплямата з Украіны», – сказала Беца.

Прозьвішча гэтага дыплямата й іншыя падрабязнасьці яна не паведаміла.

17 лістапада стала вядома, што 25 кастрычніка ў Менску супрацоўнікі КДБ Беларусі затрымалі ўласнага карэспандэнта Ўкраінскага радыё ў Беларусі, былога ўласнага карэспандэнта УНІАН у Менску Паўла Шаройку.

20 лістапада ў КДБ заявілі, што «каардынацыю дзейнасьці разьведкі» ўкраінскага разьведчыка Шаройкі, які працаваў пад прыкрыцьцём журналіста, «ажыцьцяўляў супрацоўнік Галоўнага ўпраўленьня разьведкі Міністэрства абароны Ўкраіны, які дзейнічаў пад прыкрыцьцём пасады дарадцы пасольства Ўкраіны ў Беларусі». Гаворка ішла пра Ігара Скварцова.

наша ніва/вс