Краіны АПЭК спрабуюць падняць кошт сырой нафты

Цэны нафты крыху зьнізіліся, хоць краіны АПЭК спрабуюць іх падняць. На думку экспэртаў, адносна нізкі кошт сырой нафты захоўваецца з-за высокай здабычы ў Злучаных Штатах Амэрыкі.

Сёньня барэль сырой нафты маркі Brent у Эўропе каштаваў менш чым $51.

Краіны АПЭК у выходныя дні вялі перамовы з іншымі краінамі-экспартэрамі нафты, у тым ліку з Расеяй. Мэта перамоваў заключаецца ў захаваньні абмежаванай здабычы сыравіны. Абмежаваньне экспарту павінна закончыцца летам, але АПЭК хоча падоўжыць гэты тэрмін да канца году.

Справа ў тым, што меншая колькасьць нафты на рынку спрыяе росту цаны. Аднак, як падкрэсьліваюць аналітыкі, сусьветныя запасы гэтай сыравіны вялікія, і да таго ж павялічваецца вытворчасьць у Злучаных Штатах – з сярэдзіны мінулага году больш чым на восем адсоткаў.

яс