Шатляндыя не выключае выхаду са Злучанага Каралеўства

Другі рэфэрэндум па пытаньні аб незалежнасьці Шатляндыі можа адбыцца ў наступным годзе, паведаміла кіраўнічка шатляндзкага ўраду Нікола Ст’ёрджэн.

Паводле яе, прасоўваны цэнтральным урадам гэтак званы цьвёрды брэксіт - гэта дастатковая прычына дзеля таго, каб паўтарыць галасаваньне па выхадзе Шатляндыі са складу Злучанага Каралеўства.

Нагадаем, на рэфэрэндуме па справе выхаду Вялікабрытаніі з ЭЗ 62% жыхароў Шатляндыі выказвалася за тое, каб застацца ў Эўразьвязе. У Англіі гэтага хацелі менш як 47% выбаршчыкаў.

Упершыню шатляндцы галасавалі па справе магчымай незалежнасьці ў 2014 годзе. Тады большасьць выбаршчыкаў, то бок 55%, выказалася за тое, каб застацца ў складзе Злучанага Каралеўства. Супраць прагаласавалі 45% шатляндцаў.

Згоду на правядзеньне другога рэфэрэндуму павінен даць цэнтральны ўрад. Да гэтага часу прэм'ер-міністар Вялікабрытаніі Тэрэза Мэй не хацела камэнтаваць справы. Аднак многія палітычныя аглядальнікі лічаць, што па палітычных прычынах адхіліць фармальную просьбу Шатляндыі аб паўторным галасаваньні цэнтральнаму ўраду ня будзе лёгка.

аз