Дзярждума прыняла заяву аб украінска-польскай дэклярацыі

Дзярждума Расеі прыняла заяву адносна «Дэклярацыі памяці й салідарнасьці», за якую прагаласавалі Сэйм Польшчы й Вярхоўная рада Ўкраіны.

У згаданай украінска-польскай дэклярацыі адлюстраваныя падзеі Другой сусьветнай вайны і ўзброены канфлікт у Данбасе. У прыватнасьці, робіцца заява «аб гістарычнай ахвяры народаў Польшчы і Ўкраіны дзеля абароны свабоды й незалежнасьці». Дэклярацыя разглядае пакт Рыбэнтропа-Молатава як падставу для акупацыі Польшчы Нямеччынай і Савецкім Саюзам, рэпрэсій супраць украінскага й польскага народаў.

У сваю чаргу ў заяве Дзярждумы гаворыцца, што такім чынам польскія і ўкраінскія палітыкі спрабуюць «затушаваць» праблемы ўласных ўзаемаадносінаў «сяброўствам супраць агульнага ворага».

Гэтай правакацыяй яны ня толькі наносяць непапраўную шкоду адносінам з Расеяй, але й «падрываюць непарушнасьць уласных межаў», – адзначаецца ў заяве Дзярждумы.

Таксама гаворыцца, што прынятая ўкраінска-польская дэклярацыя пярэчыць нормам міжнароднага права. У Расеі спробу абапірацца на гэтую дэклярацыю з боку трэціх краін могуць расцаніць як «варожыя дзеяньні», зазначаецца ў дакумэнце Дзярждумы.

Дзярждума таксама заклікала парлямэнты ЗША й Вялікабрытаніі, як саюзьнікаў Расеі ў Другой сусьветнай вайне, далучыцца да заявы.

паводле интэрфакс/вс