Манголія разглядае магчымасьць далучыцца да ЭАЭС

Манголія разглядае магчымасьць далучыцца да Эўразійскага эканамічнага саюза (ЭАЭС). Пра гэта паведаміла пасол Рэспублікі Манголія ў РФ Банзрагч Дэлгэрмаа ў інтэрвію тэлеканалу „Расія 24”.

„Зараз у сьвеце ідзе працэс інтэграцыі й рэгіянальных блёкаў. Манголія, якая знаходзіцца паміж такімі вялікімі дзяржавамі, як Расея й Кітай, і якая ня мае выхаду да мора, вядома зацікаўленая ў тым, каб далучыцца да якіх-небудзь эканамічных блёкаў і эфэктыўна працаваць. У гэтым пляне, вядома, Эўразійскі эканамічны саюз уяўляе для нас вельмі вялікі інтарэс”, — цытуе пасла Манголіі расейскае агенцтва ТАСС.

Пасол таксама паведаміла, што абмяркоўвала пытаньне мэтазгоднасьці ўступленьня Манголіі ў ЭАЭС з былым прэм`ер-міністрам Армэніі, а цяпер старшынёй калегіі Эўразійскай эканамічнай камісіі Тыгранам Саркісянам.

ЭАЭС быў утвораны на базе Мытнага саюза й Адзінай эканамічнай прасторы Расеі, Беларусі й Казахстана й пачаў дзейнічаць 1 студзеня 2015 году. Пасьля да арганізацыі далучыліся Армэнія й Кыргызстан.

tass.ru/nn.by/аз