Анна Камароўска адкрыла фэстываль тэатраў у Вільні

Анна Камароўска прыняла ўдзел ва ўрачыстым адкрыцьці XIX Фэстывалю школьных тэатраў у Вільні. Мерапрыемства зладзіла адукацыйная грамадзкая арганізацыя „Macierz Szkolna”.

Зьвяртаючыся да ўдзельнікаў фэстывалю, жонка польскага прэзыдэнта нагадала, што цяпер у краіне адзначаецца 250-годзьдзе польскага тэатра. Бацькам гэтага тэатрa зьяўляецца Войцех Багуслаўскі, які цягам 5 гадоў жыў і працаваў у Вільні.

У сёлетнім мерапрыемстве ўдзельнічае 12 школьных тэатраў. Журы старшынствуе Анна Кетліньска – старшыня аддзелу аб'яднаньня „Wspólnota Polska” ў Беластоку.

Прадстаўнікі трох віленскіх школаў зьвярнуліся да першай ледзі з просьбай аб дапамозе ў захаваньні статусу іх адукацыйных установаў, якія даюць сярэднюю адукацыю. Нагадаем, у бліжэйшым часе летувіскае Міністэрства адукацыі створыць сьпіс школаў з гэткімі паўнамоцтвамі.

Анна Камароўска сказала, што яна ведае пра сытуацыю польскіх школ у Летуве й дадала, што за гэтым пытаньнем сочыць пасольства Польшчы й польскія парлямэнтары.

аз