Забойчая ініцыяцыя ў ПАР

У Паўднёва-Афрыканскай Рэспубліцы пасьля традыцыйнай цырымоніі пасьвячэньня ў мужчыны памерлі 26 хлопчыкаў, яшчэ 104 шпіталізаваныя з-за абязводжваньня, гангрэны, інфікаваньня пасьля абразаньня і іншых траўмаў.

Сем чалавек ужо арыштаваныя за ўтрыманьне нелегальных школ ініцыяцыі.

Міністэрства краіны па справах традыцыйных абшчын заявіла, што неабходна пакласьці канец гэтай практыцы. Падобныя заявы рабіліся і ў мінулым годзе, калі стала вядома пра гібель 27 хлопчыкаў. Тады скончыць з «недапушчальным звычаем» абяцаў асабіста прэзыдэнт Джейкоб Зума.

Цырымоніі ініцыяцыі ў Паўднёвай Афрыцы, як правіла, доўжацца тры тыдні. У іх удзельнічаюць дзясяткі тысяч хлопчыкаў. Акрамя абразаньня яны ўключаюць тэсты на выжываньне, у прыватнасьці выпрабаваньне холадам. Як паведамляе паліцыя, большасьць сьмяротных выпадкаў адбываецца ў афіцыйных месцах прысьвячэньня, дзе, па правілах, павінны знаходзіцца лекары, гатовыя прыйсьці на дапамогу хлопчыкам.

яс