Свабоду беларускім палітвязьням!

Кіраўнікі МЗС Летувы, Латвіі, Эстоніі і Нямеччыны, якія сустрэліся ў летувіскім Коўне, выказалі падтрымку Праграме «Ўсходняга партнэрства» ЭЗ, мэтай якой зьяўляецца заахвочваньне да больш шчыльных стасункаў з шасьцю постсавецкімі краінамі. Гэтая праграма зьяўляецца адным з прыярытэтаў Летувы, якая на паўгоду стане старшынём у Радзе ЭЗ у ліпені, піша ru.delfi.lt.

У камюніке міністры «пацьвердзілі гатовасьць» падпісаць у лістападзе на саміце «Ўсходняга партнэрства» пагадненьне аб асацыяцыйным сяброўстве і вольным гандлі з Украінай, але адзначылі, што для гэтага патрэбныя далейшыя крокі, якіх чакае ЭЗ.

ЭЗ патрабуе ад Кіева спыніць «сэлекцыйнае правасудзьдзе» - гэтым тэрмінам вызначаецца перасьлед апазіцыі, найперш зьняволеньне былой прэм'ер-міністар Юліі Цімашэнкі.

ЭЗ таксама заклікае зьліквідаваць заганы выбарчага працэсу і рэалізаваць іншыя рэформы, прадугледжаныя парадкам працы асацыяцыі.

Чацьвёра міністраў таксама заявілі, што «дамовіліся аб патрэбе захоўваць уцягнутасьць Беларусі ў шматбаковае вымярэньне ўсходняга партнэрства».

«Яны паўтарылі, што ўсе палітычныя зьняволеныя павінны быць вызваленыя і рэабілітаваныя, з тым, каб ЭЗ перагледзеў сваю палітыку ў дачыненьні да Беларусі ў пазытыўным ключы», - гаворыцца ў заяве міністраў замежных спраў Летувы, Эстоніі, Латвіі і Нямеччыны Лінаса Лінкявічуса, Урмаса Паэта, Эдгарса Рынкевічса і Гвіда Вэстэрвэле.

charter97.org/эб