Мартынаў наведае Армэнію

Міністр замежных спраў Беларусі Сяргей Мартынаў 16–17 красавіка наведае з афіцыйным візытам Армэнію, - паведаміў прэс-сакратар МЗС Андрэй Савіных падчас брыфінгу ў Менску.

У Ерэване кіраўнік беларускага зьнешнепалітычнага ведамства сустрэнецца з прэзыдэнтам, прэм’ер-міністрам і міністрам замежных спраў Армэніі.

Бакі абмяркуюць шырокае кола пытаньняў двухбаковага супрацоўніцтва, у тым ліку ў палітычнай, гандлёва-эканамічнай, гуманітарнай і іншых сфэрах, паведаміў Савіных.

Асаблівая ўвага, падкрэсьліў прэс-сакратар, будзе нададзена пытаньням умацаваньня супрацоўніцтва на міжнароднай арэне, у тым ліку ў межах ААН, АБСЭ й АДКБ.

Як заявіў Савіных, Беларусь разьлічвае на разьвіцьцё адносінаў з Армэніяй у галіне навукі й адукацыі, у тым ліку шляхам наладжваньня кантактаў паміж МЗС.

Акрамя таго, беларускі бок зацікаўлены ў пастаўках у Армэнію дарожнай, грузавой і сельскагаспадарчай тэхнікі, а таксама ў стварэньні на тэрыторыі гэтай краіны зборачных вытворчасьцяў аўтатрактарнай і сельскагаспадарчай тэхнікі.

nn.by/аз