Фрыстайліст ня можа ўзнавіцца ад траўмы ўжо 5 гадоў

Некалі вядомы беларускі фрыстайліст Дзьмітры Рак ня можа ўзнавіцца ад траўмы ўжо болей за 5 гадоў. Чыноўнікі ўжо даўно не дапамагаюць фінансава. Грошы на лекаваньне Рака дапамагаюць зьбіраць звычайныя спартоўцы.

На этапе Кубку сьвету па фрыстайле ў Кітаі беларускі спартовец няўдала прызямліўся й стукнуўся галавою. Гэтыя жахлівыя кадры паказалі, відаць, усе інфармацыйныя агенцыі сьвету.

Падняўшыся пасьля прызямленьня, Дзьмітры празь некалькі хвілін адчуваў сябе вельмі дрэнна. Кітайскія ўрачы канстатавалі кровазьліцьцё ў мозг. Беларускі фрстайліст цягам некалькіх тыдняў быў у коме.

А пасьля, калі яго перавезьлі ў Беларусь, яшчэ працяглы час ня мог размаўляць і хадзіць.

Нацыянальны алімпійскі камітэт выдаткаваў на рэабілітацыю Дзьмітрыя Рака каля 10 тысяч даляраў ЗША. Але гэтых грошай аказалася вельмі мала дзеля належнага лекаваньня. А пазьней спартовыя чыноўнікі папросту забыліся пра некалі пэрспэктыўнага фрыстайліста.

Дзьмітрыю Раку дапамагалі былыя сябры па зборнай Беларусі й іншыя неабыякавыя спартоўцы.

У 2012 годзе на лекаваньне Дзьмітрыя зноўку спатрэбіліся грошы. Але афіцыйныя структуры ад аказаньня такой дапамогі адмаўляюцца.

Падтрымаць траўмаванага фрыстайліста ўзяліся беларускія гандбалісты. Так, 25 лютага ў Палацы спорту згуляюць лідары чэмпіянату Беларусі “Дынама-Менск” і “БГК імя Мяшкова”. Усе сродкі, сабраныя з квіткоў, пойдуць на рэабілітацыю Дзьмітрыя Рака.

Аляксандар Парошын