Беларусь хоча пашырыць работу з дыяспарай

Аб гэтым міністар замежных спраў Уладзімір Макей паведаміў сёньня на пасяджэньні Кансультатыўнага савета па справах беларусаў замежжа, перадае БЕЛТА. Уладзімір Макей заўважыў, што ў 2020 годзе завяршаецца рэалізацыя дзяржаўнай праграмы «Беларусы ў сьвеце», таму цяпер пачынаецца распрацоўка новага праграмнага дакумэнта. «Вопыт практычнай рэалізацыі гэтай праграмы па лініі органаў дзяржкіраваньня, замежных устаноў паказвае неабходнасьць не абмяжоўвацца культурна-гуманітарнай сфэрай», – сказаў Макей.

Міністар падкрэсьліў, што ад прадстаўнікоў беларускай дыяспары чакаюць рэкамэндацый па гэтым пытаньні.

Уладзімір Макей адзначыў, што пашырэньне эканамічных інтарэсаў Беларусі за мяжой ужо зьяўляецца важным напрамкам супрацоўніцтва дзяржавы з беларускай дыяспарай у розных краінах. Яе прадстаўнікі ў Нямеччыне, Ізраілі, Кыргызстане, Летуве, Малдове, Польшчы, Расеі і Чэхіі актыўна працуюць у гэтым напрамку разам з беларускімі кампаніямі.

У пасяджэньні Кансультатыўнага савета па справах беларусаў замежжа прынялі ўдзел члены савета з 17 краін, а таксама прадстаўнікі дзяржаўных устаноў і грамадзкіх аб'яднаньняў Беларусі.

яс