БНФ зьвярнуўся да ўраду Летувы

Старшыня Партыі БНФ Рыгор Кастусёў зьвярнуўся да Лінаса Лінкявічуса і міністра культуры Міндаўгаса Квяткаўскаса з просьбай аб разьмяшчэньні на магілах паўстанцаў 1863-1864 гадоў надпісаў па-беларуску.

Рыгор Кастусёў заявіў, што з радасьцю вітае ідэнтыфікацыю ў Вільні парэштак пахаваньня кіраўніка вызвольнага паўстаньня супраць расейскага прыгнёту Кастуся Каліноўскага, а таксама іншых лідэраў паўстаньня. Таксама БНФ з належнай пашанай ды гонарам ставіцца да перапахаваных парэштак Кастуся Каліноўскага ды ягоных паплечнікаў і ўсталяваньня адпаведных мэмарыяльных шыльдаў.

Разам з гэтым партыя БНФ выказала заклапочанасьць тым, што на памятных шыльдах будуць адсутнічаць надпісы на беларускай мове, а толькі на летувіскай і польскай.

Рыгор Кастусёў зазначыў, што Кастусь Каліноўскі зьяўляецца нацыянальным героем і для беларусаў. Многія беларусы шмат гадоў ушаноўваюць памяць Кастуся Каліноўскага ў тых мясьцінах, што зьвязаныя з жыцьцём і дзейнасьцю Кастуся Каліноўскага ў Беларусі. Партыя БНФ зьяўляецца аднымі з арганізатараў штогадовага фэсту памяці паўстанцаў Каліноўскага, што адбываецца на радзіме Кастуся Каліноўскага каля Сьвіслачы.

Кіраўнік партыі БНФ зьвярнуўся да летувіскіх палітыкаў з вялікай просьбай і настойлівым заклікам зрабіць неабходныя захады, каб беларуская мова прысутнічала на новых мэмарыяльных шыльдах у месцы пахаваньня Кастуся Каліноўскага ды ягоных паплечнікаў у Вільні.

Паводле прэсавай службы Партыі БНФ/юл