У Беларусі прайшлі затрыманьні арганізатараў «дамоўных матчаў»

У Беларусі прайшлі затрыманьні арганізатараў «дамоўных матчаў». Як інфармуе прэс-служба МУС, 5 студзеня супрацоўнікі галоўнага ўпраўленьня па барацьбе з арганізаванай злачыннасьцю й карупцыяй МУС затрымалі ў Магілёве й Менску ўдзельнікаў міжнароднай злачыннай групы. Паводле зьвесткаў міліцыі, гэтыя людзі працяглы час займаліся арганізацыяй і правядзеньнем «дамоўных» гульняў «у розных гульнявых камандных відах спорту» (паводле газэты «Прессбол», у футболе й валейболе). Незаконны прыбытак яны атрымлівалі з букмэкерскіх кантор краін заходняй Эўропы й Азіі.

Крымінальныя справы распачатыя па артыкулах «махлярства» й «подкуп удзельнікаў і арганізатараў прафэсійных спартыўных спаборніцтваў і відовішчных камэрцыйных конкурсаў». Пад вартай знаходзяцца трое падазраваных. Прэс-служба Сьледчага камітэту інфармуе ў Telegram, што гэта – былыя прафэсійныя спартоўцы.

МУС высьвятляе асобы ўсіх удзельнікаў злачынных схемаў і прапануе ім самім «добраахвотна й ініцыятыўна» зьвяртацца да правахоўнікаў.

Папярэдні раз пра выкрыцьцё злачыннай схемы «дамоўных» матчаў Міністэрства ўнутраных спраў Беларусі заявіла ў ліпені 2016 году. У кастрычніку 2017-га былі асуджаныя 15 чалавек. Яны атрымалі альбо абмежаваньне свабоды, альбо штрафы. Летась Беларуская фэдэрацыя футболу пажыцьцёва дыскваліфікавала гэтых людзей.

эўрарадыё/вс