Рух «За Свабоду» атрымаў статус назіральніка ЭНП

На пасяджэньні палітасамблеі Эўрапейская народная партыя (ЭНП) прагаласавала за наданьне статусу назіральніка Руху «За Свабоду».

«З Эўрапейскай народнай партыяй мы зьвязаныя больш чым дзесяцігадовай гісторыяй партнэрства і супрацоўніцтва. Мы ганарымся тым, што падзяляем каштоўнасьці і бачаньне гэтай сям’і партыяў», – заявіў на паседжаньні ў Хельсінкі старшыня Руху «За Свабоду» Юры Губарэвіч.

«Статус назіральніка дае ў першую чаргу магчымасьці для больш глыбокага супрацоўніцтва як з самой ЭНП, так і з партыямі-партнёрамі па ўсёй Эўропе. Мы зможам больш эфэктыўна ўздымаць беларускае пытаньне на пасяджэньні Эўрапейскай народнай партыі, надаваць больш увагі да рэпрэсіяў і магчымага перасьледу актывістаў і палітыкаў у Беларусі», – пракамэнтаваў рашэньне ЭНП Губарэвіч.

Эўрапейская народная партыя — адна з найбуйнейшых партыяў Эўропы, уключае ў сябе правацэнтрысцкія партыі з розных краінаў эўрапейскага кантынэнту. ЭНП уключае ў сябе 16 кіраўнікоў урадаў краін — членаў ЭЗ і 6 кіраўнікоў урадаў краін, якія не ўваходзяць у ЭЗ, таксама 13 членаў Эўрапейскай камісіі, старшыню Эўразьвязу, старшыню Эўрапарлямэнту і найбуйнейшую фракцыю ў Эўрапарлямэнце.

З Беларусі статус назіральніка пры ЭНП таксама маюць Аб’яднаная грамадзянская партыі і Партыя БХД.

pyx.by/яс