Луашэнка патрабуе напружыцца, каб сабраць ураджай

Прэзыдэнт Беларусі Аляксандар Лукашэнка патрабуе прыкласьці максымум намаганьняў, каб ураджай у краіне быў як мага большы. Аб гэтым кіраўнік дзяржавы заявіў 1 жніўня ў час азнаямленьня з арганізацыяй уборкі збожжавых у Менскім раёне.

Лукашэнка адзначыў, што ў гэтым годзе з-за гарачага надвор'я ў многіх краінах чакаецца вельмі вялікі недабор збожжа. Так, загінулі збожжавыя ў Нямеччыне і Польшчы, ня лепшым чынам складваецца сытуацыя ў Францыі і Гішпаніі. У Расеі прагназуюць 25 працэнтаў недабору да ўзроўню мінулага года.

Таму Лукашэнка заклікае прыкласьці «максымум напружаньня для таго, каб сабраць да зернетка тое, што мы сёньня вырасьцілі, і кукурузу».

Паводле папярэдніх разьлікаў, у бягучым годзе ўраджай у Беларусі будзе меншы на паўмільёна тон у параўнаньні зь мінулагоднім. Аднак запасы збожжа ў краіне складаюць 1,5 млн т.

Belta.by/вк