Лукашэнка і Пуцін абмеркавалі магчымую сустрэчу й адносіны з ЗША

Сёньня Аляксандр Лукашэнка абмеркаваў па тэлефоне з расейскім калегам Уладзімірам Пуціным магчымую сустрэчу, дзейнасьць Эўразійскага эканамічнага саюза й расейска-амэрыканскія адносіны. Званок адбыўся па ініцыятыве расейскага боку, адзначылі ў прэс-службе кіраўніка Беларусі.

У ходзе тэлефоннай размовы Ўладзімір Пуцін запрасіў Аляксандра Лукашэнку ў бліжэйшы час наведаць Расею. Паводле інфармацыі прэс-службы беларускага лідара, магчымая сустрэча можа прайсьці ў Сочы.

Акцэнт у перамовах быў зроблены на пашырэньне гандлёвага супрацоўніцтва. Палітыкі дамовіліся працягваць узаемныя намаганьні ў інтарэсах захаваньня пазытыўнай дынамікі ўзаемадзеяньня.

Акрамя таго, Аляксандр Лукашэнка і Ўладзімір Пуцін закранулі пытаньні міжнароднага парадку дня. Яны падрабязна абмеркавалі расейска-амэрыканскія адносіны, уключаючы вынікі нядаўніх перамоваў Пуціна й Дональда Трампа ў Хэльсінкі.

тэлеграф/вс