У Трасьцянцы Лукашэнка гаварыў пра «дэманаў нецярпімасьці»

29 чэрвеня ў мэмарыяльным комплексе «Трасьцянец» (падчас Другой сусьветнай вайны там быў лягер сьмерці) прайшоў мітынг-рэквіем. У ім узяў удзел Аляксандр Лукашэнка, на мерапрыемства прыехалі таксама прэзыдэнты Германіі й Аўстрыі – Франк-Вальтэр Штайнмаер і Аляксандр Ван дэр Бэлен. Польшчу прадстаўляў кіраўнік Канцылярыі прэзыдэнта Кшыштаф Шчэрскі.

У сваёй прамове Лукашэнка гаварыў пра «дэманаў нецярпімасьці», зь якімі сутыкаецца сусьветная супольнасьць. «Сёньня мы бачым, што мінулае нас не пакідае, – цытуе словы кіраўніка Беларусі агенцтва БелТА. – Многія не прызнаюць дзяржаўных межаў. Сусьветная супольнасьць зноў сутыкаецца з «дэманамі нянавісьці», якія распальваюць нянавісьць і правакуюць гвалт».

Лукашэнка нагадаў, што Беларусь выступае за новы маштабны міжнародны дыялёг, які павінен дапамагчы пераадолець усе супярэчнасьці. Таксама ён заклікаў захаваць праўду пра вайну й «не дапусьціць адраджэньня страшэннага мінулага».

паводле эўрарадыё/вс