Узнавіла працу славутая Галерэя «Ў»

Галерэя пераехала з праспэкту Незалежнасьці, 37А, на модную вуліцу Кастрычніцкую, 19.

Галоўная перавага новага памяшканьня – вялікая прастора, плошчай каля тысячы квадратных мэтраў, і ўтульны, закрыты ад староньняга вока ўнутраны дворык.

Паўгода таму сузаснавальнікі галерэі знайшлі новае месца для культавай установы – на вуліцы Кастрычніцкай,19, у цэху былога заводу імя Кастрычніцкай рэвалюцыі. У старым памяшканьні выставачная прастора складала каля 170 квадратных мэтраў. Агульная плошча новай пляцоўкі – каля 1 тысячы квадратаў пры вышыні 7 мэтраў.

У чацьвер новую культурніцкую прастору ацаніла творчая інтэлігенцыя, журналісты, а ў пятніцу яна адкрыецца для шырокай грамадзкасьці. Першая імпрэза – выстава «Без выключэньня. У працэсе». Першы праект на новым месцы – пра інклюзіўнасьць.

У лістападзе 2017 году Галерэя «Ў» закрылася – участак зямлі ў цэнтры сталіцы каля плошчы Перамогі (былое тралейбуснае дэпо) прадалі з аўкцыёну пад новую жылую забудову.

Паводле Радыё Свабода/юл