У Беларусі могуць увесьці адказнасьць за распаўсюд ілжы ў інтэрнэце

У Беларусі абмяркоўваецца пытаньне аб увядзеньні адказнасьці за распаўсюд ілжывай інфармацыі ў інтэрнэце, у тым ліку ананімнай крыніцай. Пра гэта паведаміў генэральны пракурор Аляксандар Канюк 6 чэрвеня ў Мінску, узнагароджваючы пераможцаў рэспубліканскага конкурсу на лепшае асьвятленьне ў СМІ дзейнасьці органаў пракуратуры.

Як паведамляе інфармагенцтва БелТА, Канюк удакладніў, што гаворка ідзе аб увядзеньні адміністрацыйнай і крымінальнай адказнасьці, а таксама, магчыма, буйных матэрыяльных спагнаньняў. Зараз, нагадаў ён, у беларускім заканадаўстве прадугледжана адказнасьць, у тым ліку крымінальная, за паклёп.

Камэнтуючы па просьбе БелаПАН выказваньне генэральнага пракурора, старшыня Беларускай асацыяцыі журналістаў (БАЖ) Андрэй Бастунец заявіў: пытаньне аб увядзеньні крымінальнай адказнасьці за распаўсюд ілжывай інфармацыі ў інтэрнэце зьяўляецца «чарговай спробай дзяржавы закруціць гайкі ў інфармацыйнай сфэры».

«Інтэрнэт доўгі час быў і пакуль што застаецца найбольш вольнай прасторай для распаўсюду інфармацыі. Але апошнія намаганьні дзяржавы значна пашыраюць магчымасьці кантраляваць інфармацыю ў інтэрнэце і змагацца з інфармацыяй, якую дзяржава лічыць немэтазгоднай, забароненай, той, што ёй не падабаецца», – падкрэсьліў кіраўнік БАЖ.

www.belapan.by/нг