Выпускныя іспыты ў беларускіх школах будуць мяняцца

Чыноўнік зьвярнуў увагу на тое, што форма школьных выпускных іспытаў не адпавядае форме ўступных іспытаў у вышэйшыя і сярэднія спэцыяльныя навучальныя ўстановы. На думку Карпенкі, трэба стварыць новы фармат, які збалянсуе патрэбы школы, навучэнца і бацькоў.

Міністар паабяцаў, што новы фармат іспытаў ня будзе нечаканым, а зьявіцца на працягу аднаго-двух гадоў.

Акрамя таго, Карпенка паведаміў, што ў наступным годзе плянуюцца пэўныя зьмены пры паступленьні ў ВНУ. Напрыклад, па некаторых спэцыяльнасьцях могуць зьявіцца ўнутраныя ўступныя іспыты. «За цэнтралізаваным тэставаньнем нельга страціць асобу абітурыента», – патлумачыў чыноўнік.

Акрамя таго, разглядаецца магчымасьць памяняць мэтадалёгію падліку балаў на цэнтралізаваным тэставаньні. Новая сыстэма павінна стаць больш зразумелай для абітурыентаў і бацькоў. Апрабаваць яе плянуецца ўжо на гэтай уступнай кампаніі, але знаёмыя з ёй пакуль будуць толькі спэцыялісты.

euroradio.fm/яс