ЭЗ выдзеліць Беларусі 130 тыс. эўра на ўзмацненьне кіналягічнай службы мытні

Беларусь атрымае ад Эўразьвязу грант па праекце міжнароднай тэхнічнай дапамогі «Узмацненьне магчымасьцяў кіналягічнай службы мытных ведамстваў Рэспублікі Беларусь і Рэспублікі Польшча». Адпаведны дакумэнт падпісаны паміж Менскай цэнтральнай мытняй і Міністэрствам інвэстыцый і эканамічнага разьвіцьця Польшчы ад імя ЭЗ, паведамляе сайт Мытнага камітэту.

Вядучым бенефіцыярам праекту выступае Менская цэнтральная мытня. Праект ажыцьцяўляецца разам з падаткова-мытнай адміністрацыяй Беластока. ЭЗ вылучыць на яго рэалізацыю каля 220 тыс. эўра, зь якіх каля 130 тыс. эўра пойдзе для Беларусі.

Гэты праект скіраваны на барацьбу з арганізаванай злачыннасьцю, недапушчэньне крымінальнай дзейнасьці й перамяшчэньня празь мяжу кантрабандных альбо абмежаваных тавараў. У яго рамках будзе ладзіцца навучаньне для супрацоўнікаў кіналягічных службаў Беларусі й Польшчы, а таксама будзе закуплены спэцыяльны транспарт для перамяшчэньня службовых сабак.

эўрарадыё/вс