Аўтобус зь беларусамі трапіў у аварыю ў Латвіі

Раніцай у панядзелак 30 красавіка, на Баускаскай шашы ў аварыі пасажырскага аўтобусу зь Беларусі пацярпелі пяць чалавек, паведамляе паліцыя Латвіі. У латвійскай Службе неадкладнай мэдыцынскай дапамогі паведамілі, што ў гэтым ДТЗ пацярпелі восем чалавек.

Дарожна транспартнае здарэньне адбылося прыкладна ў 7 гадзін раніцы на 30-ым кіляметры Баускаскай шашы ў рыскім накірунку.

Па наяўнай інфармацыі, кіроўца аўтобусу маркі МАЗ не справіўся з кіраваньнем, з гэтае прычыны транспартны сродак зьехаў у кювэт.

Агулам у выніку ДТЗ пацярпелі восем чалавек. Два чалавекі з траўмамі сярэдняй ступені цяжкасьці былі дастаўленыя ў бальніцу, шэсьць чалавек адмовіліся ад шпіталізацыі.

Апублікаваныя ў сацсетках фатаграфіі сьведчаць аб тым, што ў аварыю трапіў аўтобус беларускай дзяржаўнай кампаніі «Мінсктранс», які накіроўваўся па маршруце Менск-Рыга і павінен быў прыбыць у латвійскую сталіцу ў панядзелак у 8 гадзін раніцы.

Паводле delfi.lv/ эж