У суботу, 17 лютага, у Менску перазахаваюць Магдалену Радзівіл

У суботу, 17 лютага, а 10-й у менскай парафіі Найсьвяцейшай Тройцы (сьв. Роха на Залатой Горцы) адбудзецца перазахаваньне парэштак Магдалены Радзівіл.

Мэцэнатка й культурная дзеячка Марыя Магдалена Радзівіл у свой час аказвала фінансавую падтрымку выдавецтву «Загляне сонца і ў наша аконца», газэце «Беларус», шпіталям, сельскім крамам і гэтак далей. У 1917 годзе яна ахвяравала дыямэнтавае калье на заснаваньне беларускай грэка-каталіцкай калегіі ў Рыме – грошы былі перададзены айцам марыянам у Друі.

Як расказаў Catholic.by пробашч парафіі ксёндз Юры Санько, урна з парэшткамі Магдалены Радзівіл будзе выстаўленая для разьвітаньня ў касьцёле вечарам 16 лютага.

Паводле яго слоў, парэшткі будуць перазахаваныя ў левай частцы сьвятыні. На тым месцы будзе ўсталявана памятная шыльда й барэльеф у гонар славутай мэцэнаткі.
На ўрачыстасьць прыбудуць Мацей і Міхал Радзівілы, а таксама праўнучка Магдалены Радзівіл – Марылена Замойская.

наша ніва/вс