Для зьняволеных у Беларусі ўвядуць электронныя бранзалеты

Электронныя бранзалеты для зьняволеных плянуюць увесьці ў Беларусі ў 2018 годзе. Пра гэта паведаміў начальнік Дэпартамэнта выкананьня пакараньняў МУС Сяргей Дарошка падчас прамой лініі ў газэце „СБ. Беларусь сегодня”.

Ён мяркуе, што такі маніторынг дазволіць зьнізіць колькасьць людзей у месцах пазбаўленьня волі. Асобаў, якія зьдзейсьнілі не цяжкія злачынствы й якія не зьяўляюцца небясьпечнымі для грамадзтва, ня будуць ізаляваць, а толькі абмяжуюць у пэўных правах.

„Калі гэта спрацуе, то ў сьледчых ізалятарах будзе на 15% меней людзей, чым цяпер”, — сказаў Сяргей Дарошка.

Таксама ён распавёў пра стварэньне „калгасу” для зьняволеных — працаваць на сельгаспрадпрыемстве ў Сьветлагорскім раёне змогуць толькі што вызваленыя, а таксама тыя, у каго заканчваецца тэрмін, або адбываецца замена тэрміну на ўмоўна-датэрміновае вызваленьне або папраўчыя працы. Такім чынам дзяржава спрабуе вырашыць праблему працаўладкаваньня былых зэкаў.

euroradio.fm/аз