Пачаўся вывад расейскіх войскаў з Беларусі пасьля вучэньняў «Захад-2017»

Пагрузка расейскай вайсковай тэхнікі, задзейнічанай у вучэньнях «Захад-2017», пачалася на чыгуначнай станцыі Вярэйцы пад Асіповічамі. Гэтая тэхніка выкарыстоўвалася на палігоне Асіповіцкім – адным з шасьці ў Беларусі, дзе праходзілі вучэньні.

Як перадае Радыё «Свабода», уначы на станцыі – на плятформах і проста на вуліцы пад платамі жылых дамоў стаялі каля 50 танкаў рознай мадыфікацыі, а таксама БТР, БМП ды іншая тэхніка. 37 БТР-аў ужо загружаныя на плятформы. Уся тэхніка не мае апазнавальных знакаў (апроч нумароў) і стаіць без аховы.

Сумесныя беларуска-расейскія стратэгічныя вучэньні «Захад-2017» праходзілі з 14 па 20 верасьня.

svaboda.org/euroradio.fm/яс