Беларускі фільм узнагародзілі ў Вэнэцыі

На 74-м Вэнэцыянскім кінафэстывалі была ўзнагароджаная двухсэрыйная кінастужка Элема Клімава «Ідзі і глядзі», зьнятая паводле сцэнара Алеся Адамовіча ў 1985 годзе. Фільм атрымаў узнагароду ў намінацыі «Вэнэцыянская клясыка».

Стужку здымалі сумесна «Беларусьфільм» і «Масфільм». У ёй распавядаецца пра беларускага падлетка, які падчас вайны стаў сьведкам карных апэрацый нацыстаў.

У Савецкім Саюзе кінастужка ў 1986 годзе была прызнаная найлепшай кінакарцінай года і атрымала Дзяржаўную прэмію СССР.

На Вэнэцыянскі кінафэст карціну Клімава і Адамовіча прывезьлі адрэстаўраванай. Рэстаўрацыяй чатыры месяцы займаліся на «Масфільме». Канкурэнтамі «Ідзі і глядзі» ў рубрыцы «Кінаклясыка» былі фільмы Стывена Спілбэрга, Мікеланджэла Антаніёні і Бярнарда Бэрталучы.

Галоўны прыз Вэнэцыянскага фэстывалю сёлета атрымала стужка «Форма вады» рэжысэра Гільерма дэль Тора.

euroradio.fm/яс