Прэм’еры Беларусі й Славакіі сустрэліся ў Браціславе
PR dla Zagranicy
Alaksandar Papko
27.04.2017 16:45
Урады дзьвюх краінаў намераныя павялічыць таваразварот.
Робэрт Фіца й Андрэй Кабякоў, Браціслава 27 красавіка 2017 г. Фота прэс-службы славацкага ўраду. vlada.gov.sk
Славакія разьлічвае павялічыць таваразварот зь Беларусьсю – заявіў прэм’ер-міністар Славакіі Робэрт Фіца пасьля перамоваў з кіраўніком ураду Беларусі Андрэем Кабяковым, якія прайшлі ў Браціславе.
«Славакія ня можа быць задаволеная тым узроўнем таваразвароту зь Беларусьсю, які быў у мінулым годзе, – каля 163 мільёнаў эўра», – цытуе Робэрта Фіца афіцыйнае інфармагенцтва БЕЛТА.
Як заявіў прэм’ер Беларусі Андрэй Кабякоў, гэты візыт беларускай дэлегацыі ў Славакію стаў «добрым працягам дыялёгу, пачатага ў лістападзе 2016 году». Як і падчас мінулай сустрэчы ў Менску, Андрэй Кабякоў і Робэрт Фіца абмяркоўвалі пытаньні гандлёва-эканамічнага супрацоўніцтва.
За мінулыя месяцы бакі прасунуліся па шэрагу напрамкаў, напрыклад, у галіне фармацэўтыкі, энэргетыкі і ўтылізацыі адходаў – паведамляе дзяржаўнае інфармагенцтва.
belta.by/ап