Самалёт з радыеактыўным грузам перавозіў абсталяваньне з армянскай АЭС

У армянскім самалёце, які транзытам сьледаваў праз Гомель, перавозілася абсталяваньне з атамнай электрастанцыі. Самалёт ляцеў з Армэніі ў Балгарыю, а потым у Харватыю. Пра гэта паведамляе „Арменпрэс” са спасылкай на Міністэрства энэргетычных інфраструктур і прыродных рэсурсаў Армэніі.

Падрадчык работ на Армянскай АЭС — харвацкая кампанія „Хрыд” у кастрычніку 2016 году імпартавала ў Армэнію абсталяваньне для работ па кантролі за эксплёатацыяй у рамках праграмы мадэрнізацыі. Пасьля завяршэньня работ абсталяваньне адправілі назад тым жа шляхам, што й прывезьлі. За перавозку адказвала беларуская авіякампанія JSC Aircompani Grodna, кажуць у армянскім міністэрстве.

Армянскі бок заяўляе, што авіяцыйным уладам Беларусі далі адпаведную інфармацыю й атрымалі ад іх дазвол на палёт. Працэс перавозкі абсталяваньня, як паведамляецца, адбываўся ў адпаведнасьці зь міжнароднымі патрабаваньнямі.

Раней у Армэніі адмаўлялі наяўнасьць радыеактыўных рэчываў на борце самалёта, які прыбыў з Ерэвана ў Гомель. Між тым, беларускі бок паведаміў, што груз на гэтым самалёце перавышаў радыяцыйны фон у 250 разоў.

euroradio.fm/аз