Лукашэнка падтрымаў праект мытнага кодэксу ЭАЭС

Аляксандар Лукашэнка ўхваліў праект дамовы аб Мытным кодэксе Эўразійскага эканамічнага саюзу ў якасьці асновы для правядзеньня перамоваў.

Гэта вынікае з указа № 499, які афіцыйна апублікаваны на Нацыянальным прававым інтэрнэт-партале.

Указ прадугледжвае, што дамова будзе падпісаная пры дасягненьні пагадненьня ў межах ухваленага праекту. На правядзеньне перамоваў па дамове ўпаўнаважаны Дзяржаўны мытны камітэт.

Новая рэдакцыя Мытнага кодэксу Эўразійскага эканамічнага саюзу была падпісаная 26 сьнежня ў Санкт-Пецярбургу на пасяджэньні найвышэйшай Эўразійскай эканамічнай рады. Подпіс пад гэтым дакумэнтам паставілі кіраўнікі Расеі, Казахстану, Армэніі і Кыргызстану.

Аляксандар Лукашэнка не прыехаў на саміт. Масква заявіла, што дакумэнты былі ўзгодненыя зь беларускімі партнэрамі, і будуць накіраваныя ў Менск на подпіс Лукашэнкі.

Мытны кодэкс ЭАЭС павінен замяніць Мытны кодэкс Мытнага саюзу, прыняты ў 2009 годзе. Плянуецца, што ён пачне дзейнічаць зь 1 ліпеня 2017 году.

Паводле Белта/Радыё „Свабода”/юл