Беларусь рыхтуецца да рамонту мясцовых дарог

Пра гэта сёньня заявіў Аляксандар Лукашэнка на адкрыцьці другой часткі Менскай кальцавой аўтадарогі. Беларускі кіраўнік даручыў распрацаваць плян па рэканструкцыі аўтамабільных дарог мясцовага значэньня, якія прыходзяць у непрыгоднасьць.

Аляксандар Лукашэнка заявіў, што аднаўленьне павінна паспрыяць таму, каб кожны аграгарадок (а іх каля 2 тысяч па краіне) быў злучаны з раённым цэнтрам.

Раённыя ды абласныя дарогі ў Беларусі ў нядрэнным стане, лічыць беларускі кіраўнік. Пры гэтым яны таксама будуць прыводзіцца ў парадак.

Грашовыя сродкі на рамонт дарог прадставіць адзін з банкаў. Вяртаць крэдыт будуць за кошт дзяржаўнай пошліны, якую плацяць грамадзяне за допуск транспартнага сродку да ўдзелу ў дарожным руху. Дарогі – гэта твар нашай краіны, вітрына Беларусі, падсумаваў Аляксандар Лукашэнка.

Паводле Белта/юл