ЭЗ увёў антыдэмпінгавую пошліну на арматуру БМЗ

Эўрапейская камісія ўстанавіла папярэднюю антыдэмпінгавую пошліну ў дачыненьні да арматуры вытворчасьці Беларускага мэталюргічнага завода (БМЗ). Пошліна на арматурныя пруты й стрыжні для бэтону ўстаноўлена ў памеры 12,5%. Інфармацыя аб гэтым зьмяшчаецца ў афіцыйным часопісе ЭЗ (europa.eu).

Рашэньне аб пастаянна дзейнай антыдэмпінгавай пошліне павінна быць прынятае да 20 чэрвеня. Як правіла, такая пошліна ўводзіцца тэрмінам на пяць гадоў.

Нагадаем, Эўракамісія 31 сакавіка пачала антыдэмпінгавае расьсьледаваньне ў дачыненьні да БМЗ па экспарце ў ЭЗ гарачакачанай арматуры. Адпаведная скарга была пададзена 15 лютага 2016 году Эўрапейскай асацыяцыяй вытворцаў сталі (Eurofer) па даручэньні прадпрыемстваў, якія кантралююць больш за 25% рынку арматуры ў Эўразьвязе.

У прыватнасьці Eurofer скардзіўся на вялікія аб`ёмы паставак арматуры зь Беларусі па нярыначных цэнах, што аказала адмоўны ўплыў на аб`ёмы продажаў і цэны на рынку ЭЗ і неспрыяльна адбілася на фінансавым становішчы шэрагу эўрапейскіх вытворцаў.

У ходзе расьсьледаваньня павінен быў быць вывучаны пэрыяд з 1 студзеня па 31 сьнежня 2015 году. Пры гэтым вывучэньне тэндэнцый рынку ахоплівала пэрыяд з 1 студзеня 2012 году па 31 сьнежня 2015 году.

Беларускі мэталюргічны завод быў запрошаны Эўракамісіяй да ўдзелу ў працы камісіі па расьсьледаваньні.

belapan.com/аз