Кніга Томаса Ўрбана «Катынь, 1940 год» выйшла па-беларуску

Выдавецтва часопіса «Arche» выдала кнігу нямецкага дасьледчыка Томаса Ўрбана «Катынь, 1940 год. Гісторыя аднаго злачынства». Катынская трагедыя пазбавіла жыцьця тысяч польскіх афіцэраў і прадстаўнікоў інтэлігенцыі. Кніга ўтрымлівае шмат малавядомых фактаў ня толькі пра самую трагедыю, але й пра тое, як зьвесткі пра яе хаваліся й фальсыфікаваліся, – кажа галоўны рэдактар часопіса «Arche» Валер Булгакаў.

«Томас Урбан дбайна, дэталёва рэканструюе тыя падзеі, якія мелі месца, таксама выкрывае тую павалоку хлусьні, якую агарнула савецкае грамадзтва ў звязку з гэтай трагедыяй, у звязку з гэтымі масавымі забойствамі», – сказаў Булгакаў.

Томас Урбан таксама распавядае гісторыю пасьляваенных і сучасных міждзяржаўных дачыненьняў, у якіх Катынь па-ранейшаму адыгрывае вялікую ролю.
Прэзэнтацыя кнігі з удзелам аўтара адбудзецца заўтра, 18 лістапада, у Менску ў Галерэі TUT.BY. Пачатак а 19-й гадзіне.

рацыя/вс