У Беларусі засталося толькі 20 мядзьведзяў

Белстат апублікаваў дадзеныя аб колькасьці асноўных відаў паляўнічых жывёлаў. Каго ў беларускіх лясах паболела, а каго паменела?

Найбольшая папуляцыя ў зайцаў — іх 159 тысяч (прырост за год 7 тысяч). Усьлед ідуць вавёркі — 118 тысяч (+16 тысяч).

Амаль аднолькавая колькасьць казуляў (75 тысяч, +3 тысячы) і баброў (72 тысячы, +9 тысячы).

Расьце й колькасьць ласёў. Іх цяпер 32 тысячы (+2 тысячы). Прыблізна столькі ж разьвялося андатраў (30 тысяч) і лісаў (27 тысяч).

А вось дзікоў, якіх некалькі гадоў таму, да пачатку эпідэміі сьвіной чумы, было каля 80 тысяч, цяпер засталося толькі 8 тысяч.

Але найбольш за год пацярпела папуляцыя мядзьведзяў. У папярэднія гады ў Беларусі фіксавалася 110-120 асобін, а летась засталося 20 мядзьведзяў. У Белстаце запэўнілі, што гэта не абдрукоўка, а праўдзівыя зьвесткі.

nn.by/аз