Рассельгаснагляд заявіў аб рээкспарце грыбоў і рэдзькі зь Беларусі

Рассельгаснагляд заявіў пра сваю заклапочанасьць у сувязі з пастаўкамі зь Беларусі відаў харчаваньня, якія для Беларусі не характэрная. І прапануе беларускаму боку абмеркаваць гэтую праблему. Пытаньні выклікаюць пастаўкі ў Расею праз беларускую тэрыторыю садавіны, грыбоў і рэдзькі.

Адзначаецца, што ва ўмовах дзеяньня санкцый Расеі ў адносінах пэўнай прадукцыі з краін ЭЗ, Беларусь стала найбуйнейшым пастаўшчыком прадуктаў, якія раней у РФ не пастаўляла. Падобная тэндэнцыя назіраецца ў адносінах гародніны, ягад і экзатычнай садавіны. У Маскве заяўляюць, што некаторая прадукцыя (ягады, грыбы) мае „падробленыя фітасанітарныя сэртыфікаты” Марока й Турцыі, рэдзька - Паўднёваафрыканскай рэспублікі. Раней гэтыя краіны такую прадукцыю ў Расею не пастаўлялі, адзначае Рассельгаснагляд.

У расейскім ведамстве лічаць, што ў апошнія месяцы рэзка ўзрасла рызыка „дэстабілізацыі харчовай бясьпекі РФ” з-за паступленьня з Беларусі падобнай прадукцыі, да якой няма даверу. Расейцаў не задавольвае праца сыстэмы пацьверджаньня сапраўднасьці фітасанітарных сэртыфікатаў, якая дзейнічае ў Беларусі. Калі летась было выяўлена 82 такія падробленыя дакумэнты, дык сёлета ўжо 388.

У Маскве заяўляюць, што пастаўкі прадукцыі ў Расею „у суправаджэньні беларускіх рээкспартных сэртыфікатаў з прыкладаньнем падробленых фітасанітарных сэртыфікатаў Турцыі, Македоніі, Эквадора, Эгіпта, ПАР, Босьніі й Герцагавіны, Марока, Сэрбіі, Туніса, Ізраіля, Бразыліі й Чылі носяць сыстэмны характар”.

euroradio.fm/аз