Беларусь падала ў польскі суд на "Белсат"

Беларускія судзьдзі хочуць, каб польскі суд прызнаў іх вырак, згодна зь якім «Белсат» парушае правы менскага прадпрымальніка. Кіраўніцтва каналу лічыць вырак палітычна матываваным.

Акружны суд у Варшаве атрымаў вырак беларускага Вярхоўнага суда, які тычацца забароны ўжываньня таварнага знаку «Белсату». Абапіраючыся на палажэньні Грамадзянскага працэсуальнага кодэксу гаспадарчы аддзел раённага суда ў Варшаве можа надаць сілу прысуду й забараніць «Белсату» выкарыстоўваць свой таварны знак на тэрыторыі Беларусі. Перад прыняцьцем свайго рашэньня суд у Варшаве папрасіў тэлебачанне TVP, часткай якога зьяўляецца «Белсат», прадставіць сваю пазыцыю.

У верасьні 2014 году Вярхоўны суд Беларусі задаволіў пазоў Андрэя Белякова й забараніў тэлеканалу выкарыстоўваць назву, гандлёвы знак «Белсат ТВ» пры трансьляцыі на тэрыторыю Беларусі й на інтэрнэт-старонцы.

З пазовам супраць «Белсату» выступіў Андрэй Белякоў з фірмы «БЕЛСАТплюс». Ён патрабаваў забароны выкарыстаньня таварнага знаку «Белсат ТВ» нібыта праз тое, што людзі асацыююць таварны знак ягонага прадпрыемства з тэлеканалам «Белсат».

«Людзі асацыююць нас з тэлеканалам, прыходзяць, як да карэспандэнтаў са сваёй бядою, прапановамі. Гэта перашкаджае нам працаваць», – заявіў бізнэсовец.
Справу супраць «Белсату» ў Вярхоўным судзе разглядалі два разы. Першы раз прэтэнзіі Белякова адкінулі. У другі раз гэтае рашэньне перагледзелі, такім чынам, каб не было магчымасьцяў абскардзіць канчатковы вырак.

Паводле дырэктаркі каналу Агнешкі Рамашэўскай-Гузы, ажыцьцявіць забарону на выкарыстаньне лягатыпу «Белсат» наўрад ці магчыма, бо знак зарэгістраваны на тэрыторыі Польшчы ды Эўразвязу. Такім чынам, назву можна выкарыстоўваць у інтэрнэце і ў праграмах на спадарожніку. На ейную думку, суд супраць «Белсату» – палітычна матываваны.

БАЖ/ав