Інтэрактыўныя экраны ў старым горадзе Менска

Гістарычны цэнтр Менска неабходна абсталяваць інтэрактыўнымі экранамі, заявіў 30 сакавіка старшыня Менгарвыканкама Андрэй Шорац. Паводле яго слоў, з дапамогай экранаў можна будзе ўбачыць, дзе разьмяшчаюцца музэі, галерэі, аб'екты грамадзкага харчаваньня, крамы з сувэнірамі і гэтак далей.

Акрамя таго, у гістарычным цэнтры горада (Ракаўскае і Траецкае прадмесьця, Верхні горад, Менскае замчышча) у 2015 годзе плянуецца ўсталяваць скульптуру ў гонар 500-годзьдзя зьявы на водах ракі Сьвіслач іконы Божай Маці і помнік кампазітару Станіславу Манюшку, перадае БелТА.

Таксама ў гэтым годзе плянуецца завяршыць рэканструкцыю Верхняга горада: завяршыць забудову правага боку вуліцы Гандлёвай, на якой будуць разьмяшчацца два гатэльныя комплексы, выставачна-дзелавы цэнтр, аб'екты грамадзка-гандлёвага прызначэньня. Акрамя таго, будзе завершана рэканструкцыя будынкаў №№ 31 і 33 па вуліцы Інтэрнацыянальнай, дзе разьмесьцяцца аб'екты грамадзкага харчаваньня і грамадзка-бытавога прызначэньня, будынка па вуліцы Ракаўскай, 14, распрацоўваецца праектна-каштарысная дакумэнтацыя па аднаўленьні будынкаў па вуліцы Вызваленьня.

яс/БелТА