На Заходняй Дзьвіне ў Віцебску рыбака выратавалі з ільдзіны

Як паведамляе Міністэрства па надзвычайных сытуацыях, каля 10.30 мужчына выйшаў на лёд парыбачыць. Прыкладна праз дваццаць хвілін крыга, на якой знаходзіўся чалавек, адкалолася й паплыла. Патрапіць на бераг стала немагчыма. Плошча адколатага лёду была каля 100 кв. м.

Званок у МНС паступіў ад мужчыны, які цярпеў бедства, у 11.01. Праз тры хвіліны на месца выкліку прыбылі ратавальнікі. Было ўстаноўлена, што на рацэ на адлегласьці каля 50 м ад берага на крызе знаходзіцца чалавек. Таўшчыня лёду складала ўсяго 5-6 см, а глыбіня ракі — да 5 м.

У 11.08 работнікі МНС з выкарыстаньнем канца Аляксандрава, ратавальнай дошкі, вадалазнага касьцюма сухога тыпу, ратавальнага кола і ратавальных камізэлек рыбак быў зьняты з крыгі і дастаўлены на бераг. Мужчына не пацярпеў.

Ратавальнікі нагадваюць: выхад на тонкі лёд небясьпечны. Пры ўстойлівай плюсавай тэмпэратуры, якая назіраецца на працягу апошніх дзён, лёд інтэнсіўна растае.

яс/БелаПАН