У Беларусі зьявіцца беларускамоўная духоўная акадэмія

Канфэрэнцыя каталіцкіх біскупаў атрымала афіцыйную рэгістрацыю навучальнай установы „Менская духоўная акадэмія імя Сьвятога Яна Паўла Другога”. Акадэмія будзе адкрытая ня толькі для будучых сьвятароў, але й для сьвецкіх асоб.

Прэс-сакратар Канфэрэнцыі каталіцкіх біскупаў ксёндз Юры Санько лічыць, што гэта вельмі важная падзея ў жыцьці Каталіцкага касьцёла ў Беларусі.

„Упершыню пасьля савецкага пэрыяду адчыняецца паўнавартасная каталіцкая навучальная ўстанова. Першае й асноўнае, гэта будзе тэалёгія. Але на гэтым мы ня хочам спыняцца”, - кажа Санько.

Канчатковая праграма навучаньня ў Духоўнай акадэміі будзе ўзгодненая ў Ватыкане. Акадэмія будзе працаваць у будынку менскага дабрачыннага каталіцкага таварыства „Caritas“ у вёсцы Ляскоўка каля Бараўлянаў.

racyja.com/аз