Суд не задаволіў скаргі Алены Танкачовай

Суд Першамайскага раёна Менска адмовіў праваабаронцы Алене Танкачовай у задавальненьні скаргі на рашэньне раённага ўпраўленьня ўнутраных спраў аб высылцы яе зь Беларусі. Такое рашэньне агучыла 13 студзеня судзьдзя Натальля Петух.

Нагадаем, 5 лістапада мінулага года УУС Першамайскага раёна прадпісала Танкачовай на працягу месяца пакінуць Беларусь і забараніла ёй наведваць краіну ў найбліжэйшыя тры гады. Падставай для такога рашэньня сталі зафіксаваныя відэакамэрамі факты нязначнага перавышэньня хуткасьці аўтамабілем Танкачовай.

Праваабаронца гэтае рашэньне абскардзіла. Працэс абскарджваньня прадугледжвае прыпыненьне прадпісаньня аб высылцы на тры месяцы - па месяцу на абскарджаньне ў кожнай з прадугледжаных інстанцый. 12 сьнежня праваабаронцы адмовілі ў задавальненьні скаргі ў першай інстанцыі - ГУУС Менгарвыканкама.

Грамадзянка Расеі Алена Танкачова жыве ў Беларусі каля 30 гадоў. На працягу 20 гадоў Танкачова й Цэнтр прававой трансфармацыі, які яна ўзначальвае, аказваюць прафэсійную юрыдычную й экспэртную падтрымку некамэрцыйным арганізацыям Беларусі, а таксама ў сытуацыях з парушэньнямі правоў чалавека.

Грамадзкія актывісты сабралі 7 тысяч подпісаў пад просьбай не высылаць Танкачову з краіны. Прадстаўнікі грамадзянскай супольнасьці лічаць дзеяньні ўлад непрапарцыянальнай і палітычна матываванай санкцыяй, зьвязанай з прафэсійнай дзейнасьцю праваабаронцы.

БелаПАН/nn.by/аз